Сэдэб “Арһа элдэлгэ”

Январиин 14-һөө үдэр һэлгээд Буряад ФМ радиодо 8-һаа 11 саг болотор «Үглөөнэй мэндэ» гэһэн шууд дамжуулга гаража захалба. Энэ дамжуулгада эртын амар мэндые айладхажа, шэнэ һонин мэдээ хүргэжэ, ямар нэгэ һонин сэдэбээр хөөрэлдэжэ байхабди.
«Үглөөнэй мэндэ» дамжуулгада харагшадай асуудалнуудта айлшад-экспертнүүд харюу үгэхэ аргатай. Манай шагнагшад сэхэ эфиртэ хонходожо, Буряад Уласай аймагуудай болон хүршэ нютаг можонуудай, хүдөө нютагуудай ажабайдалтай утасаар дуулгаха аргатай.
Анха түрүүшын нээлтын дамжуулгада «Арһа элдэлгэ» гэһэн сэдэбээр хөөрэлдөөн болоо. Хамба лама Дамба Аюшеев, Шэнэхээн нютагай уран гартан Мажигма эгэчи, Ивалгын дасанай дэргэдэхи хониной арһа элдэдэг цех эрхилэгшэ Түмэн Хоцаев, Хори аймагһаа хониной арһа элдэгшэ Жаргалма Очиржапова гэгшэд арһа элдэхэ арга хөөрэжэ үгэбэ.
Шагнагшадай дуратай «Асуудал-Харюу» наадан үнгэрөө, мүн багша, оёдолшон Сэсэгма Балданова, «Хатан Этномаркет» дэлгүүрэй захирал Баирма Бальжинимаева, Арадай Уран бэлигэй түбһөө Сергей Доржиев, Дарима Дашиева гэгшэд утасаар холбоо барижа, арһаар оёдог, хэгдэдэг хубсаһан, эд бараа тухай хөөрэжэ үгэбэ. «Үглөөнэй мэндэ» гэһэн түрүүшын дамжуулгые Жанна Дымчикова, Бадмажаб Гындынцыренов хүтэлбэ.
Дараагай «Үглөөнэй мэндэ» дамжуулга январиин 16-да 8 сагһаа эхилхэ. Сурбалжалагша Эрдэм Будаин Улаан-Үдэ хотын агаарай бохирдол, түлеэ залһанай, пеэшэн, котельниин, зайн галай сэдэбээр хөөрэлдөө хэхэ.